Shunday qilib, qanday huquqbuzarliklar uchun fuqarolikdan mahrum etilish mumkinligi bo‘yicha ro‘yxat kengaytirilmoqda

Deputatlar Rossiya Federatsiyasi fuqaroligini olgan muhojirlarni bir qator jinoyatlar uchun fuqarolikdan mahrum etish haqidagi qonun loyihasini Davlat Dumasiga taqdim etdilar. Bu haqda palata raisi Vyacheslav Volodin ma’lum qildi.

“Bugun deputatlar qonun loyihasini kiritishdi. Davlat Dumasidagi barcha hamkasblarimizdan uni qo‘llab-quvvatlashni taklif etdik. Rossiya fuqaroligidan mahrum etishga asos bo‘luvchi holatlar ro‘yxatini kengaytirish zarur deb hisoblaymiz”, – deb yozdi Volodin o‘zining Telegram kanalida.

Xususan, Rossiya xavfsizligiga qarshi xorijiy davlat bilan hamkorlik qilganlik uchun ham fuqarolikdan mahrum etilishi mumkin, dedi Volodin.

“Rossiya Federatsiyasi fuqaroligidan mahrum etish uchun asoslar ro‘yxatini kengaytirish zarur deb hisoblaymiz. Bunga quyidagilarni kiritishni taklif qilamiz: Rossiya xavfsizligiga qarshi maxfiy tarzda xorijiy davlat, xalqaro yoki chet el tashkilotlari bilan hamkorlik qilish (RF JK 275.1-modda)”, – deb yozdi Volodin.

Bundan tashqari, deputatlar quyidagi jinoyatlarni ham asoslar ro‘yxatiga kiritishni taklif qilmoqda: terrorchilik faoliyatiga ochiq chaqiriqlar, terrorizmni oqlash yoki targ‘ib qilish (RF JK 205.2-modda, 1-qism); Rossiya ishtirok etmaydigan xalqaro tashkilotlar yoki xorijiy davlat organlari qarorlarini amalga oshirishga ko‘mak berish (RF JK 284.3-modda); Rossiya xavfsizligiga qarshi yo‘naltirilgan faoliyatda dushmanga yordam ko‘rsatish (RF JK 276.1-modda); natsistlar atributikasi yoki ramzlarini targ‘ib qilish (RF JK 282.4-modda); davlat xavfsizligiga qarshi faoliyatga ochiq chaqiriqlar (RF JK 280.4-modda); Rossiyaning tanqidiy axborot infratuzilmasiga noqonuniy aralashuv (RF JK 274.1-modda, 4-5-qismlar).