Rossiya Ichki ishlar vazirligi rasmiy vakili Irina Volk raqamli profil xorijliklar uchun davlat xizmatlarini olish jarayonini yengillashtirishini ta’kidladi.

30-iyundan boshlab, chet elliklar Rossiyaga safar qilishdan kamida 72 soat oldin rejalashtirilgan kirish haqida elektron ariza to‘ldirishlari kerak. Bunday talab hukumat qarorida belgilanganini Rossiya Ichki ishlar vazirligi rasmiy vakili Irina Volk eslatdi.

"Ko‘rsatilgan sanadan (30-iyun) boshlab Rossiyaga vizasiz tartibda kiradigan xorijiy fuqarolar, jumladan nogiron yoki voyaga yetmaganlarning qonuniy vakillari, Rossiyaga safar qilishdan kamida 72 soat oldin elektron ariza to‘ldirishlari shart", — deb yozgan u o‘zining Telegram-kanalida.

Volkning qo‘shimcha qilishicha, agar Rossiyaga shoshilinch kirish zarurati bo‘lsa va buni tasdiqlovchi hujjatlar mavjud bo‘lsa, arizani safardan kamida to‘rt soat oldin ham to‘ldirish mumkin. Masalan, shoshilinch tibbiy yordam, og‘ir kasallik yoki yaqin qarindoshning o‘limi bilan bog‘liq holatlar. "Elektron ariza RuID mobil ilovasi orqali to‘ldiriladi. Bu “Gosuslugi” portalining analogi bo‘lib, faqat xorijiy fuqarolar uchun mo‘ljallangan va ularga raqamli profil yaratib beradi", — deya tushuntirdi vazirlik vakili. Uning aytishicha, ushbu chora migratsion oqimlarni nazorat qilishni takomillashtirish bo‘yicha tizimli ishlarning navbatdagi muhim bosqichidir.