Аз 5 феврал дар Русия барои хориҷиёне, ки ғайриқонунӣ дар ин кишвар қарор доранд, режими депортатсия эътибор пайдо кард. Дар ин бора вазорати корҳои дохилии Русия ёдовар шуд.

Қонуни федералӣ дар бораи муқаррар кардани низоми нави ҳуқуқии ихроҷи муҳоҷиронро Владимир Путин, раиси ҷумҳури Русия моҳи августи соли гузашта имзо карда буд.

Ҳама муҳоҷирони ғайриқонунӣ бояд ба феҳристи шахсони таҳти назорат қарордошта то ихроҷ ё хориҷ шудани мустақилона аз Русия ё то танзими вазъи ҳуқуқии онҳо дар кишвар ворид карда шаванд.

Ин феҳрист дар вебсайти Вазорати корҳои дохилии Федератсияи Русия ҷойгир карда мешавад ва ба таври ройгон дастрас аст. Дар ин вебсайт шахсони воқеӣ ва ҳуқуқӣ, аз ҷумла корфармоён метавонанд маълумотро дар бораи шаҳрванди хориҷӣ дастрас кунанд.

Режими ихроҷ маҳдуд кардани ҳуқуқ ва озодиҳои муайяни муҳоҷирони ғайриқонуниро пешбинӣ мекунад.

Масалан, онҳо наметавонанд бе иҷозати мақомоти корҳои дохилӣ ҷои иқоматро иваз кунанд, берун аз минтақа сафар кунанд, мошинҳои нақлиётӣ идора кунанд, амалиёти бонкӣ анҷом диҳанд ва моликият ба даст оранд. Ҳамчунин, хориҷиёне, ки таҳти назорат қарор доранд, наметавонанд дар Русия издивоҷ кунанд.

Дар сурати такрори қонуншиканӣ, муҳоҷир дар муассисаи махсуси мақомоти ҳудудии ВКД ҷойгир карда, сипас аз Русия ихроҷ карда мешавад.